«Jahon sayyohlik markazlaridan biri bo’lish uchun O’zbekistonda ulkan imkoniyatlar mavjud»
18.01.2012

 Gollandiyaning Utrext shahrida Benilyuks mamlakatlari mintaqasida eng nufuzli xalqaro sayyohlik anjumani hisoblanadigan «Vakantiebeurs 2012» yarmarkasi bo’lib o’tdi. 
  
 Ushbu yirik sayyohlik yarmarkasi 85 ming kvadrat metr sahnni egalladi. «Vakantiebeurs 2012» yarmarkasida dunyoning 150 mamlakatida faoliyat ko’rsatadigan 2 mingdan ziyod sayyohlik kompaniyalari qatnashdi. Unda ayniqsa, Yevropa Ittifoqi, Shimoliy va Janubiy Amerika mamlakatlari kompaniyalari faol ishtirok etdilar. 

Sayyohlik operatorlari tomonidan taklif qilinadigan sayohat yo’nalishlari, mehmonxonalar va chiptalar buyurtmasi singari keng qamrovli ma'lumotlar yarmarkaning rasmiy katalogidan joy oldi. Ulkan ko’rgazma inshootining markaziga o’rnatilgan axborotlar peshtaxtasi mazkur yarmarka ishida qatnashayotgan sayyohlik kompaniyalarining reklama-axborot materiallariga juda boy bo’ldi. 

«Vakantiebeurs 2012» yarmarkasida O’zbekiston bo’ylab o’ziga xos va qiziqarli sayohat yo’nalishlari Gollandiya hamda Belgiyaning qator taniqli sayyohlik kompaniyalari tomonidan taklif qilindi. Ular o’zlarining chiroyli bezatilgan rang-barang reklama materiallarida quyoshli o’lkamiz haqidagi, mamlakatimizning boy tarixiy-madaniy merosi va me'moriy yodgorliklari to’g’risidagi ma'lumotlarni yevropalik sayyohlar e'tiboriga havola etdilar. 

Yevropa sayyohlik kompaniyalari rahbarlarining aytishlaricha, Buyuk Ipak yo’li bo’ylab sayohat bugungi kunda Benilyuks mamlakatlari sayyohlari o’rtasidagi eng ommabop yo’nalishlardan biri hisoblanadi. 

Yarmarka ishi doirasida “Jahon” axborot agentligining muxbiri Yevropa sayohlik kompaniyalarining ayrim vakillari bilan muloqotda bo’ldi. 

  Niderlandiyadagi “DJOSER” sayyohlik kompaniyasining direktori Xerman Van Der Veldening ma'lum qilishicha, uning kompaniyasi O’zbekiston bo’ylab sayohat yo’nalishlarini yevropaliklarga taklif qilib kelayotganiga 10 yildan ziyod vaqt o’tdi. U qayd etganidek, keyingi yillar davomida Yevropa sayyohlari orasida mamlakatimizga bo’lgan qiziqish sezilarli darajada kuchaygan. 

“Jahon sayyohlik markazlaridan biri bo’lishi uchun O’zbekistonda ulkan imkoniyatlar mavjuddir”, dedi “DJOSER” sayyohlik kompaniyasining rahbari. 

 Niderlandiyaning mashhur “Eurocult-Lito Reizen” kompaniyasi direktori Paul Albers ham O’zbekistondagi Samarqand, Buxoro, Xiva, Toshkent singari ko’hna shaharlarning madaniy-tarixiy yodgorliklari, o’zbek xalqining boy va o’ziga xos urf-odat hamda an'analari, jumladan, ochiqko’ngilligi va mehmondo’stligi, shuningdek, totli milliy taomlari butun dunyo sayyohlarini o’ziga ohanrabodek jalb etishini alohida ta'kidladi. Uning ma'lum qilishicha, yarmarka ishining birinchi kuniyoq kompaniyaga joriy yili O’zbekiston bo’ylab sayohatga chiqish istagi bildirilgan ko’plab buyurtmalar kelib tushdi.