O’zbekistonda ichki turizmni rivojlantirishning mintaqaviy dasturlari tayyorlanyapti
02.01.2012

 Bunday qaror O’zbekiston Respublikasi Vazirlar Mahkamasida dekabrda bo’lib o’tgan kengashda qabul qilingan, unda turizm sohasini yanada rivojlantirish va turistik xizmatlar eksportini ko’paytirish masalalari ko’rib chiqildi.

   Xususan, kengashda 2012—2013 yillarda ichki turizmni rivojlantirish bo’yicha mintaqaviy dasturlarni tayyorlash to’g’risida qaror qabul qilindi, ularni amalga oshirish dam oluvchilar uchun qulay sharoitlar yaratish va o’zbekistonliklarning mamlakat bo’ylab turistik safarlariga qiziqishlarini faollashtirishga imkon yaratadi.

   “O’zbekturizm” MK matbuot xizmatining 2011yil 27 dekabrdagi 01-14/1-299—son kengash bayonnomasiga asoslanib bergan ma’lumotlariga ko’ra, yangi yilda turizm sohasini rivojlantirish va 2011—2012 yillar davrida mamlakatda barcha mintaqalari turistik xizmatlarining eksport salohiyatini ko’paytirish bo’yicha aniq tadbirlar qisqa muddatli dasturlarini amalga oshirish ishi davom ettiriladi.

   Tadbirlar ichida, jumladan, “turistik bazalar, dam olish zonalari, pansionatlar, sanatoriy—kurort, davolash—sog’lomlashtirish, sport—sog’lomlashtirish, rekreatsiya va ekoturistik tashkilotlar hamda muassasalarning yagona reyestrini” barpo etish bor.

   Bundan tashqari, 2016 yilgacha bo’lgan davrda turizmni rivojlantirishning o’rtacha muddatli va uzoq muddatli dasturlarini ishlab chiqish boshlanadi, unda, turistik infratuzilmani takomillashtirishdan tashqari, O’zbekistonni turistik yo’nalish sifatida bozorga olib chiqish va ichki turizmni yanada rivojlantirish dasturlari nazarda tutiladi.

   Hozirgi vaqtda yo’ldagi turistik ko’rsatkichlar namunalarini ishlab chiqish ishi olib borilyapti, ular mamlakatning aeroportlari, temir yo’l vokzallari, avtomagistrallari va turistik markazlarida o’rnatiladi.

   Turistik xizmatlar sifatini takomillashtirish ishi doirasida “O’zbekturizm” MKning Respublika ilmiy—o’quv maslahat markazi zimmasiga mamlakat turistik kadrlarining malakasini oshirish ishi yuklangan.

   Xususan, turistlarni qabul qilish va ularga xizmat ko’rsatish bilan shug’ullanadigan tashkilotlar uchun “Mehmonparvarlik va servis darslari” mavzusida seminarlar turkumini o’tkazish mo’ljallangan.

   Kengashda ta’kidlanganidek, yakunlangan yilda mamlakatimizning xorijdagi diplomatik va boshqa vakolatxonalari tomonidan mamlakatning turistik salohiyati taqdimoti bo’yicha 400dan ortiq tadbir  o’tkazildi, bu esa O’zbekistonga turistik oqimlarni jalb etishga imkon berdi.