Surxondaryo viloyatining turizm sohasi yanada rivojlantiriladi
24.11.2011

       O’zbekiston Respublikasi Vazirlar Mahkamasi tasdiqlagan “2011–2012 yillar davrida Surxodaryo viloyatida turizm sohasini rivojlantirish va turistik xizmatlarning eksport salohiyatini ko’paytirish bo’yicha aniq tadbirlar dasturi”ga ko’ra mintaqada turizmni rivojlantirishning dolzarb masalalari hal qilinadi va ushbu tarmoqda qisqa muddatli maqsadlarga erishiladi.

    Surxondaryo viloyati turizm sohasidagi asosiy ehtiyojlarning ifodasi bo’lgan mazkur Dastur o’z ichiga amalga oshirilishi turistlarni mintaqaga jalb etish imkonini beradigan chora–tadbirlar kompleksini olgan.

   Surxondaryo viloyati noyob tarixiy–me’moriy merosga egaligi sababli, Dasturda katta e’tibor tarixiy ob’yektlarni ta’mirlash va konsrvatsiyalashga ajratilgan. Chunonchi, Termiz tumanidagi mashhur Qirqqiz va Fayoztepa obidalari, Sherobod tumanidagi Imom Termiziy masjidi, Denov tumanidagi Said Otaliq madrasasi ta’mirlanadi.

   Mehmonxona sektorini rivojlantirish sohasida “Navro’zbek Maftun Sevinch”, “Meridian”, “Premim–prof”, “Sharq” xususiy korxonalari bazasidagi mehmonxona kompleksini rekonstruksiya qilish rejalashtirilgan. Shu bilan birga 30 va 25 o’rinli mehmonxona komplekslarini qurish mo’ljallangan.

   Turistlar O’zbekiston milliy avtomagistrali bo’ylab bir joydan ikkinchi joyga borishlarida qulay sharoitlar barpo etish maqsadida Sherobod tumanida 20 o’ringa mo’ljallangan motel’, Termiz tumanida barcha qulayliklarga ega bo’lgan kemping barpo etiladi.

   Dasturda davolash–sog’lomlashtirsh turizmini rivojlantirish ham nazarda tutilgan. Shu munosabat bilan Termiz tumanida “Uchqizil diagnostika markazi”  sog’lomlashtirish kompleksi faoliyat yurita boshlaydi, Uchqizil ko’li sohilida esa kurort sonasi joylashtiriladi.

   Boysun tumanida ekologik turizmni rivojlantirish uchun qadam qo’yiladi. Birinchi navbatda infratuzilmani modernizatsiyalash sohasida “Chinor” mehmonxonasini rekonstruksiya qilish va jihozlash rejalashtirilgan.

   Dasturni amalga oshirishga jami 7,06 mln AQSh dollari yo’naltiriladi.

   Qaralsin: “2011–2012 yillar davrida Surxodaryo viloyatida turizm sohasini rivojlantirish va turistik xizmatlarning eksport salohiyatini ko’paytirish bo’yicha aniq tadbirlar dasturi”.