Қорақалпоғистон Республикаси, Элликқалъа туманининг “Гулдурсин ҳамда “Саҳтиён” МФЙлари ҳамда Чимбой туманининг “Темир жол гузар” МФЙларида Ўзбекистон Республикаси Туризмни ривожлантириш давлат қўмитаси, маҳаллий ҳокимлик, туман давлат хизматлари маркази, туман солиқ инспекцияси вакилларидан иборат ишчи гуруҳ 10 нафарга яқин оилавий меҳмон уйлари эгаларини якка тартибдаги тадбиркорлик сифатида рўйхатдан ўтказди ва Оилавий меҳмон уйлари ягона реестрига киритди. Уларга тегишли гувоҳномалар топширилди.

Ўзбекистон Республикаси Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов топшириғи билан Қўмита ўринбосари Улуғбек Азамов бошчилигидаги ишчи гуруҳи Қорақалпоғистон Республикаси шаҳар ва туманларига чиққан ҳолда туризм салоҳиятлари, туризм имкониятлари ўрганилди.

Бухородан 42 км масофада, Қизилқум саҳросининг жануби-ғарбида жойлашган “Жайрон” қўриқхонасига биринчи тамал тоши қўйилди. Ушбу эко-туристик объектни ривожлантириш ишлари питомник имкониятларини ошириш ва сайёҳлар ҳамда маҳаллий меҳмонлар ташрифи учун қулай шароит яратишга йўналтирилган.

Наманган вилояти ҳокими Хайрулло Бозоровнинг Туркиянинг Сиирт ва Испарта вилоятлари волийларига (ҳокимларига) туризм соҳасида ҳудудлараро тўғридан тўғри ҳамкорликни йўлга қўйиш юзасидан юборган таклифи қардош диёрда ижобий қабул қилинди. Яқин кунларда вилоят туризмни ривожлантириш бошқармаси ҳамда ушбу икки вилоят Маданият ва туризм бошқармалари ўртасида бу борадаги алоқаларни кучайтиришга қаратилган ҳамкорлик меморандумлари имзоланади.

Ўзбекистон Президентининг 2016 йил 2 декабрдаги 2666-сонли қарори билан тасдиқланган Туризмни ривожлантириш давлат қўмитаси тўғрисидаги Низомга мувофиқ, жорий йилнинг 17-18 август кунлари “Ипак йўли” халқаро туризм университети раҳбар ва ходимлари аттестациядан ўтказилди.