09.09.2019

Ўзбекистон Республикаси Туризмни ривожлантириш давлат қўмитаси раиси в.в.б. Абдулазиз Аққулов Францияга ташрифи доирасида “Bo Travel” кинокомпаниясининг тижорий алоқалар бўйича директори Дэниель Беншимол билан учрашди. Ўзбекистоннинг Франциядаги элчихонаси кўмагида ташкил этилган учрашув давомида Д.Беншимол Ўзбекистон ҳақида махсус телекўрсатув тайёрлаш ташаббусини билдирди.

2005 йилда Францияда асос солинган “Bo Travel” продюсерлик компанияси телевизион репортажлар ва  ҳужжатли фильмлар ишлаб чиқариш билан шуғулланади. Шу билан бирга, компания тарихий, илмий, ижтимоий ва туристик телелойиҳаларни яратишда ҳам иштирок этади. Францияда машҳур бўлган “Ажойиб сайр” (“Echappees Belles”) кўрсатуви ҳам “Bo Travel” маҳсулоти ҳисобланади.

Дэниель Беншимолнинг Абдулазиз Аққуловга маълум қилишича, айни дамда компания Франциянинг етакчи “France 5” телеканалининг шанба куни эфирга узатилувчи “Ажойиб сайр” телекўрсатувининг навбатдаги мавсумига тайёргарлик кўриш устида ишламоқда.

Беншимол  юртимизнинг франциялик сайёҳлар орасида тобора оммалашиб бораётган йўналишга айланаётганини инобатга олган ҳолда, телекўрсатувнинг навбатдаги мавсумини Ўзбекистонда тасвирга олиш айни муддао бўлишини таъкидлади. Унинг сўзларига кўра, телелойиҳанинг мақсадли дастури Франция ва умуман Европа жамиятини Ўзбекистоннинг бой маданияти, тарихий шаҳарлари ва машҳур обидалари ҳақида хабардор қилиш имконини беради.

Таъкидлаш жоизки, “Ажойиб сайр”нинг Франциядаги телеаудиторияси ҳар бир эпизодда 2 миллион нафарни ташкил қилади. Кўрсатув томошабинлар томонидан энг кўп кўриладиган вақтда эфирга узатилиши режалаштирилмоқда.

Бундан ташқари, компания ўзининг ижтимоий тармоқлардаги саҳифалари орқали ҳам Ўзбекистон ҳақидаги фильм тарғиботини йўлга қўяди. “Echappees Belles” теледастури Facebook, Instagram ижтимоий тармоқлари ҳамда  YouTube канали орқали 32,4 миллион марта томоша қилинган.

Томонлар келишувига кўра, Ўзбекистон ҳақидаги фильм эфирга узатилишидан бир ҳафта илгари Парижнинг йирик кинотеатрларидан бирида маҳаллий туркомпаниялар ва ОАВ вакилларини жалб қилган ҳолда, фильм қаҳрамонлари иштирокида премьера ташкил этилади.