23.12.2020

17-29 dekabr kunlari Turizmni rivojlantirish davlat qo‘mitasi tasarrufidagi kollej va texnikumlar xodimlari uchun “Professional ta’lim tizimida innovatsion texnologiyalardan samarali foydalanish usullari” mavzusida onlayn o‘quv seminari tashkil etildi. Seminar doirasida pedagogik jamoaning turizm sohasidagi bilimi va pedagogik mahoratini yanada oshirish hamda yangi innovatsion texnologiyalar bilan tanishtirish nazarda tutilgan.

O‘quv seminarlarini Bosh vazir o‘rinbosari, Turizmni rivojlantirish davlat qo‘mitasi raisi Aziz Abduxakimov ochib berdi, ichki hamda xalqaro mehnat bozori talablariga javob beradigan turizm sohasi kadrlarini tayyorlash bo‘yicha kollej va texnikumlar oldida turgan asosiy vazifa va maqsadlar to‘g‘risida to‘xtalib o‘tdi.

O‘quv seminari davomida hududlar va ta’lim muassasalari imkoniyati hamda mehnat bozorini o‘rganib, barcha kollej va texnikumlarning xorijiy oliy ta’lim muassasalari bilan halqaro hamkorligini yo‘lga qo‘yish haqida so‘z yuritildi. Tadbir doirasida mas’ullarga professional ta’lim tizimida ta’lim xizmatlari turlarini kengaytirish, keyingi o‘quv yili uchun esa qabul jarayonlariga tayyorgarlik ko‘rish maqsadida o‘quvchi va ularning ota-onalari qiziqishini oshirish borasidagi zarur takliflarni jamlash kabi topshiriqlar berildi.