BAA rezidenti maqomini olgan xorijiy davlatlar fuqarolari O‘zbekistonga vizasiz kirish imkoniga ega bo‘ladi
30.12.2019
2020 yilning 1 yanvaridan e'tiboran Birlashgan Arab Amirliklari (BAA) rezidenti maqomini olgan xorijiy davlatlar fuqarolari 30 kun muddatga O‘zbekistonga vizasiz kirish imkoniga ega bo‘ladi. Prezidentning 2019 yil 28 dekabrdagi “2019 yil 18 martdagi “BAA fuqarolari uchun O‘zbekiston Respublikasiga kirish rejimini yanada soddalashtirish chora-tadbirlari to‘g‘risida”gi 5691-sonli Farmoniga o‘zgartirish va qo‘shimcha kiritish to‘g‘risida”gi Farmonida (№5897) shu haqida so‘z yuritiladi.
Mazkur hujjat O‘zbekiston Respublikasiga to‘g‘ridan-to‘g‘ri xorijiy investisiyalarni jalb qilish salohiyatini yanada mustahkamlash, shuningdek, BAA investorlari uchun mamlakatimizning sarmoyaviy jozibadorligini oshirishga yo‘naltirilgan.
Farmonga kiritilgan o‘zgartirishga ko‘ra, 1-bandga quyidagi mazmunda o‘zgartirish kiritildi:
“2019 yil 20 martdan boshlab Birlashgan Arab Amirliklari fuqarolari uchun, shuningdek, 2020 yil 1 yanvardan boshlab BAA rezidenti maqomini olgan xorijiy davlatlar fuqarolari uchun O‘zbekiston Respublikasi hududiga kirgan kundan e'tiboran 30 kun muddatga vizasiz rejim belgilansin.
Birlashgan Arab Amirliklari rezidenti maqomini olgan xorijiy davlatlar fuqarolari O‘zbekiston Respublikasiga kirish vaqtida amal qilish muddati 90 kundan kam bo‘lmagan rezidentlik vizasining asl nusxasini taqdim etadilar”.
БАА резиденти мақомини олган хорижий давлатлар фуқаролари Ўзбекистонга визасиз кириш имконига эга бўлади
30.12.2020
2020 йилнинг 1 январидан эътиборан Бирлашган Араб Амирликлари (БАА) резиденти мақомини олган хорижий давлатлар фуқаролари 30 кун муддатга Ўзбекистонга визасиз кириш имконига эга бўлади. Президентнинг 2019 йил 28 декабрдаги “2019 йил 18 мартдаги “БАА фуқаролари учун Ўзбекистон Республикасига кириш режимини янада соддалаштириш чора-тадбирлари тўғрисида”ги 5691-сонли Фармонига ўзгартириш ва қўшимча киритиш тўғрисида”ги Фармонида (№5897) шу ҳақида сўз юритилади.
Мазкур ҳужжат Ўзбекистон Республикасига тўғридан-тўғри хорижий инвестицияларни жалб қилиш салоҳиятини янада мустаҳкамлаш, шунингдек, БАА инвесторлари учун мамлакатимизнинг сармоявий жозибадорлигини оширишга йўналтирилган.
Фармонга киритилган ўзгартиришга кўра, 1-бандга қуйидаги мазмунда ўзгартириш киритилди:
“2019 йил 20 мартдан бошлаб Бирлашган Араб Амирликлари фуқаролари учун, шунингдек, 2020 йил 1 январдан бошлаб БАА резиденти мақомини олган хорижий давлатлар фуқаролари учун Ўзбекистон Республикаси ҳудудига кирган кундан эътиборан 30 кун муддатга визасиз режим белгилансин.
Бирлашган Араб Амирликлари резиденти мақомини олган хорижий давлатлар фуқаролари Ўзбекистон Республикасига кириш вақтида амал қилиш муддати 90 кундан кам бўлмаган резидентлик визасининг асл нусхасини тақдим этадилар”.